Владата на денешната седница го усвои ребалансот на Буџетот и го достави до Собранието. Премиерот Зоран Заев на прес-конференција изјави дека ребалансот ќе ги усогласи разликите на проектираното и реализираното, дека ќе има кратење на непродуктивните трошоци, а дека приходите се сведени на реални очекувања.
Според Заев приходите за наредниот период се сведени на реални очекувања, а дефицитот од 2.9 отсто не е зголемен. Проекцијата на минатата влада за раст на БДП во 2017 бил 3 отсто.
„Имајќи предвид дека растот во првиот квартал е 0 проценти, наша проекција дека растот на БДП ќе биде 2,2, отсто“, рече Заев.
Најголемо кратење ќе има во премиерскиот буџет од 420 милиони денари, кај средствата предвидени за реклами и промоција. Со буџетот се кратат непродуктивните трошоци со што, како што нагласи премиерот, се прави заштеда, а приходите се сведени на реалните очекувања.
За што се трошело, или подобро расфрлало пари, Заев покажа со договорот за рекламирање на Си-Ен-Ен кој ја чинел државата 950.000 евра.
„Скратени се парите предвидени за кампањи и владини рекламирања во странство и дома. Кратењето ќе изнесува 420 милиони денари кои беа наменети за реклами и промоции. Со ребалансот ќе се опфатат стечајните рабтниците, како и субвенциите за зголемување не минималната плата на 12.000 денари од 1 септември. Со минималната плата ќе бидат опфатени 70 илјади граѓани “, рече Заев.
Тој соопшти дека владата обезбедила пари за 3.000 стечајци кои ќе добиваат месечен надомест. Во Буџетот 9 милиони евра се планирани за сите активни мерки за нови вработувања за младите. Приходите од даноци се проектирани на пониска основа, за како што рече Заев, да бидат на реална основа.
Премиерот рече дека основна цел на Владата е да креира Буџет кој на најдобар начин ќе овозможи реализација на ветувањата што ги дадоа и дека ќе овозможат услови за непречено остварување на финансиските планови.
Премиерот рече дека досега е откриен скриен долг кон стопанството од 400 милиони евра но тој долг се очекува да расте, затоа што не се „детектирани“ сè уште сите долгови.
– Нема потреба за загриженост. Ќе ги продолжиме и ќе ги завршиме капиталните инвестиции, ќе ги доизградиме салите и училиштата што се почнати. Почнавме да ги решаваме проблемите со автопатот, а ќе почнеме и со изградба на други патишта кои воопшто не се почнати – рече премиерот.
Тој очекува дека ребалансот на Буџетот ќе биде донесен пред Илинден.