Разговорите и преговорите со политичките партии за реконструкција на Владата, се уште течат, но се при крај, Reа со конкретни информации за тоа каков ќе биде конечниот епилог премиерот Зоран Заев ќе излезе по првомајските празници.

Реконструкцијата на Владата, според првичните најави на премиерот, требаше да се случи кон крајот на месецов.

– Течат разговорите и преговорите. Повеќе ги користам викендите за оваа работа, бидејќи имам многу работа, гости во Македонија и слично. Ја се се надевам дека овој викенд веќе, како што завршува месец април и ќе привршуваме со оваа работа. По првомајските празници планирам да излезам со информирање на јавноста и со соопштување пред Парламентот за сето она што ќе претставува промени во Владиниот состав, а потоа и со промени на директорски места во одредени институции. Така да на крај сме со разговорите, изјави Заев одговарајќи на новинарски прашања по потпишувањето на годишната програма за вработување.

Прашан дали се знае кои партии ќе бидат вклучени во новиот владин состав, премиерот рече дека тоа се уште не е познато бидејќи органите и телата на партиите вклучени во разговорите треба да донесат конечни одлуки.

– Не, се уште не се знае оти постои веројатно постапка до почетокот на мај каде што органите и телата на сите партии ќе си ги донесат одлуките за тоа што Заев разговарал со другите партии. Ние сме само поединци, на крајот одлуки треба да донесат соодветни органи во зависност од обемот на промените кои што би се случиле, изјави Заев.

„Пролетно кадровско проветрување“ во Владата, Заев го најави кон крајот на февруари, а неколку недели подоцна, односно кон средината на март потврди дека ќе има реконструкција на владиниот кабинет и и дека почнуваат разговори за зголемување на парламентарното мнозинство.

Премиерот тогаш рече ќе се разговара со сите опозициски партии, освен со ВМРО-ДПМНЕ.

„Апсолутно ќе разговараме со сите кои имаат намера да поддржат концепт на едно општество за сите, оние кои се придржуваат до вредностите на ова владејачко мнозинство“, изјави тогаш Заев.