Ефикасен понеделник за македонските фудбалски интернационалци. Горан Пандев и Енис Барди беа стрелци за Џенова и за Леванте во, резултатски, идентичните победи (3:1) во завршните мечеви во викенд рундите во Серија А, односно, Примера.
Капитенот на Македонија почна од клупата на „Луиџи Ферарис“ стадионот на кој гостуваше Верона на затворање на 34. коло во калчолигата. Влезе во игра во 81 минута и десетина минути подоцна успеа да се впише во листата на стрелци и тоа со ремек дело реализација. Пандев, по асистенција на Данко Лазовиќ, го лобуваше Николас на начин на кој може да позавидат и најголемите ѕвезди во најважната споредна работа во светот за конечни 3:1 и значајни три бода на џеновјаните во борбата за опстанок.
https://www.youtube.com/watch?v=Y6Cj76g5MXU
Енис Барди, пак, беше централна фигура во гостинскиот триумф на Леванте против Атлетик Билбао со 3:1. Македонскиот репрезентативец постигна два гола на „Сан Мамеш“ во меч во кој тимот од предградието на Валенсија направи голем исчекор за зачувување на статусот во Примера и за наредната натпреварувачка сезона. Првиот го прослави во 42 минута, а 120 секунди подоцна и вториот со што го трасираше патот до осма победа на неговата екипа во тековното издание на шпанскиот фудбалски шампионат. Барди се најде во почетнкиот состав на Пако Лопез и одигра 71 минута во Баскија.
https://www.youtube.com/watch?v=lxeFc3TeMl4