„Рено“ ќе затвори околу 15.000 работни места ширум светот во рамки на планот за намалување на трошоците во износ од две милијарди евра, пишува британскиот сервис „Би-Би-Си“.
„Овој план е од есенцијално значење“, изјави Клотилд Делбо, главна извршна директорка на францускиот автомобилски гигант, која истовремено најави и намалување на производството, со цел компанијата да се фокусира на попрофитабилни модели на возила.
Околу 4.600 работни места ќе бидат затворени во Франција за што веќе се отпочнати преговори со синдикатите. Во „Рено“ се надеваат дека планот, сепак, ќе се реализира преку програмите за доброволно заминување и без отпуштања, со преместување на вработените внатре во компанијата и со преквалификација.
Јапонски „Нисан“, кој е стратешки партнер на „Рено“, исто така најави големо намалување на бројот на вработени. Од „Рено“, во чиј удел државата има 15 отсто сопственост, наведуваат дека намалувањето на бројот на вработени се разгледува на шест локации. Компанијата соопшти дека ќе оди на намалување на трошоците и преку редуцирање на кооперантите во областите како инженеринг, намалување на компонентите што се користат, замрзнување на плановите за проширување во Романија и во Мароко и намалување на производството на менувачи ширум светот.
Во „Рено“ планираат до 2024 година да го намалат глобалното производство на капацитетите на 3,3 милиони автомобили од сегашните 40 милиони и да се фокусираат на производство на мали комбиња или електрични автомобили, наведува „Би-Би-Си“.