Резолуцијата за македонските црвени линии што ја иницираше ВМРО-ДПМНЕ, според најавите на лидерот Христијан Мицкоски, ќе биде ставена на дневен ред во македонското Собрание во текот на утрешниот ден. Тој апелира со сите политички партии да го поддржат документот со кој, како што истакна, се зацврстуваат националните позиции во спорот со Бугарија, но порача дека е неопходен и за почетокот на пристапните преговори со Европската Унија (ЕУ).
– Колку што имам информација, Резолуцијата ќе биде ставена на дневен ред во Собранието во текот на утрешниот ден. Очекувам поддршка од сите политички партии во Парламентот, без условувања и без демагогии, без изговори. Очекувам да се надминеме себе си и да покажеме единство што мислам дека во периодот кој следи ќе ни биде многу значајно во процесот на отпочнување на преговори со ЕУ и тоа само ќе ги зајакне на позициите на Македонија како држава, потенцираше Мицкоски пред вечерашниот настан „Промоции на политики – Македонија за сите луѓе” во скопската населба Карпош.
Во однос на датумот на одржување на локалните избори, Мицкоски нагласи дека треба да остане 17 октомври и му порача на лидерот на СДСМ и премиер, Зоран Заев да престане да го крши Уставот.
– Околу датумот на избори, тоа не е тема за која што ние ќе зборуваме на зелен пазар. Тоа е тема која што ја дефинира Уставот и навистина треба да прекинеме со праксата да го кршиме. Како дефинира Уставот, така ние треба да се однесуваме и тоа што го дефинира уставот, треба и да го примениме. Ако Уставот вели дека мандатот на градоначалниците и советите е четири години, тогаш по четири години ние треба да го имаме првиот круг избор на градоначалници и советници. Така што ова не треба да биде тема за дневна политика. Јасен е Уставот и го повикувам претседателот на Собранието, Талат Џафери да практично ги распише изборите, онака како што се според Уставот дефинирани, нагласи Мицкоски.