Вакцината против коронавирус „Абдала“, една од неколкуте што ги развива Куба, покажа ефикасност од 92,28 проценти, соопшти лабораторијата што го тестираше производот.

Центарот за генетско инженерство и биотехнологија, што ја разви вакцината, објаснува дека оваа ефикасност се постигнува по три дози. „Абдала“ е во последна фаза на клинички испитувања и мора да добие официјално одобрение од кубанските власти што се очекува најдоцна до почетокот на јули.

Кубанскиот институт за вакцинација „Финли“ во саботата објави дека неговиот адут во борбата против ковид-19 наречен „Соберана 2“ покажал ефикасност од 62 отсто по аплицирање на две од трите дози.

Поради ембаргото, Куба почна да развива свои лекови во 80-те години на минатиот век. Владата сега се надева дека во август ќе бидат вакцинирани 70 проценти од 11,2 милиони жители на Куба, а целото население до крајот на годината.