Казнети за сите грешки и промашувања. Вака Борко Ристовски го опиша поразот на Македонија од Хрватска (22:31) на Светското ракометно првенство во Германија и во Данска. Голманот на Бенфика истакна доза на самокритичност, истакна и доза на приземност со оглед дека претстојат уште два (Шпанија и Исланд), но и признание за хрватската селекција за која вели дека е поквалитетна од „црвено-жолтата“.
„На Хрватска ` се поклопија сите коцкички денеска. Ние промашивме зицери што нормално ги користиме, а Хрватите имаат искусен тим што знаеше да казни и преку контри и полуконтри даваше лесни голови. Нема многу што да се објаснува. Едноставно е, Хрватска е поквалитетна репрезентација од нас и тоа треба да го прифатиме. Глава горе, продолжуваме напред. Пред нас се уште два меча и треба да се обидеме да добиеме барем еден за пласман во главната фаза“ изјави македонската ракометна „единица“ по првиот пораз на мундијалот.
По тактиката „седум на шест“ посегнаа и Лино Червар и Раул Гонзалез. Притоа подобро се снајдоа Хрватите кои на одмор заминаа со плус 5 (16:11). Македонија не доби ништо во нападите со човек повеќе на сметка на голман меѓутоа Ристовски не сакаше да навлегува премногу во замислите на селекторот, па понуди дипломатски одговор.
„Немам коментар. Таква беше замислата на Раул со која веруваше дека може да донесе резултат. Тоа се тактички надмудрувања со кои требаше извадиме максимум во напад и да не дозволиме брзи голови. Но,кога нема да искористите шанси, доаѓа казна, особено што наспроти нас имавме ривал каква е Хрватска што се вбројува меѓу петте кандидати за титулата на ова Светскко првенство“, вели човекот со девет одбрани против Хрватите.
Македонија е пред ден одмор на мундијалот пред двата последни меча во групата Б во Минхен, во среда од 20.30 часот против Шпанија и во четврток од 18 часот со Исланд. Потребна е една победа за продолжување во главната фаза на турнирот што ќе значи преселба во Келн и уште три нови меча со селекции од групата А во која се Франција, Германија, Русија, Србија, Бразил и Кореја.