Во Романија е покрената истрага против пет лекари, од кои еден е приведен, поради сомнеж дека продале стотина дефибрилатори и пејсмејкери извадени од починати пациенти, соопшти денеска романското обвинителство.
Еден од петте лекари, кои работеле во болница во Јаши, се наоѓз во притвор додека трае истрагата по обвинение за злоупотреба на положбата и примање поткуп, наведува обвинителството.
Според извештаите, тој лекар надгледувал група од четворица други лекари, кои му доставувале импланти за срце извадени од починати пациенти без нивно или одобрение од семејствата.
Лекарот е осомничен дека извршил 238 операции од 2017 година користејќи импланти од починати пациенти или од непознато потекло, со што неговите пациенти биле изложени на опасност од компликации или смрт.
Голем број од тие импланти, кои лекарот ги препорачал, не биле неопходни и биле препорачани врз основа на лажни дијагнози или претходно препишани лекови што би довеле до одредени симптоми, соопштуваат од обвинителството.
Романскиот здравствен систем е поткопан од корупција, неефикасност и управување под политичко влијание, пишуваат медиумите, истакнувајќи дека земјата изградила само една болница во последните 30 години, дека најмалку троши за здравството во ЕУ и дека десетици илјади лекари и медицински сестри емигрираат.