Кристијано Роналдо изрази уверување дека силата и искуството на Реал Мадрид се покажале како пресудни моменти при елиминацијата на Атлетико во полуфиналето во Лигата на шампиони. Фудбалерите на Диего Симеоне имаа водство со 2:0 по 16 минути игра во реваншот на „Висенте Калдерон“ и им недостасуваше уште еден за целосно анулирање на негативата од првиот меч на „Сантијаго Бернабеу“. Еуфоричната атмосфера на трибините се претвори во молк пред полувремето. Иско погоди за намалување на 2:1 и безбедно трасирање на патот на „кралскиот“ клуб кон финалето во Кардиф.
„Знаевме дека со еден гол ќе ги убиеме. Можеше сешто да се случи, но бевме добри, изгледавме добро како тим, го контролиравме натпреварот. Имаме поголемо искуство од нив и го покажавме тоа“, изјави Португалецот по средбата.
Симеоне, пак, истакна дека е горд на играчите и покрај елиминацијата.
„Првите 30 минути ќе влезат во историјата на клубот. Одигравме извонредно во нив, демонстриравме врвен квалитет и поединечно и како тим. Верувавме дека можеме и бевме блиску да го добиеме и двомечот. За тоа и се подготвувавме, но нивниот гол многу нe погоди“, истакна Симеоне за „Марка“.