Бројот на жртвите од експлозијата на метан во рудникот за јаглен „Листвјажнаја“, во областа Кемерово во југозападен Сибир, се искачи на 57, јави агенцијата ТАСС. Меѓу загинатите има и спасувачи.
Вкупно 57 луѓе загинаа, вклучително и спасувачи вклучени во операцијата за пребарување и спасување, изјави неименуван извор од руската служба за брза помош.
Поради вчерашната експлозија на метан во рудникот за јаглен, 50 лица се хоспитализирани, додека други 13 лица добиле амбулантска нега, според зборовите на регионалниот заменик министер за здравство, Виталиј Керасков.
До 10 часот, лекарска помош побарале вкупно 63 лица. Тринаесет добиле амбулантна нега, а останатите се пренесени во четири регионални болници, рече Керасков.
Гувернерот на Кемеровската област, Сергеј Цивиљов изјави дека 11 спасувачи се хоспитализирани за време на спасувачката акција во рудникот „Листвјазнаја“, каде, според прелиминарните податоци, претходно се случила експлозија на метан.
Еден спасувач е хоспитализиран со повреда на черепот, а десет поради труење. Лекарите ја оценуваат нивната состојба како умерена до тешка, изјави гувернерот.
Според руското Министерство за вонредни ситуации, во моментот на инцидентот во рудникот имало 287 рудари, а вкупно 239 лица биле евакуирани. Полицијата ги приведе директорот на рудникот, неговиот заменик и надзорникот на областа задолжена за катастрофи.
Во тој регион денеска почнува тридневна жалост.