Портпаролот на Министерството за одбрана генерал-мајор Игор Конашенков изјави дека при руските напади уништени се сите цели. Тој дополни дека Москва претходно ја предупредила Турција за планираното бомбардирање.
Претходно денеска, Москва ги обвини бунтовниците дека при нивниот напад биле отруени 46 луѓе, вклучително и осум деца. Според сириската државна агенција САНА, бројот на повредени е 107.
Државните медиуми објавија дека некои се во критична состојба. Нападите биле извршени во трговски квартови во градот.
Командантот на сириските бунтовници Абдел-Салам Абдел-Разак ги отфрли тврдењата дека бил употребен отровен гас, објаснувајќи дека тие не поседуваат такво нешто, ниту имаат можност да го користат при напади.
– Тоа е лага, напиша Абдел-Разак на Твитер откако беа објавени извештаи за нападот на Алепо.
Претходно сириски официјален претставник изјави дека најмалку 50 цивили побарале лекарска помош поради проблеми со дишењето по бунтовничкиот напад.
Локалните медиуми, повикувајќи се на полициски извори, соопштија дека бунтовниците истрелале ракети наполенти со хлор.
Сириските безбедносни сили на овој напад одговориле со ракетирање на бунтовнички позиции.