Најмалку 14 лица, меѓу кои и борци од Иран, загинаа утрово во напад на воена база во централниот дел на Сирија, соопшти Сириската опсерваторија за човекови права.
Засега не се знае кој го извршил нападот на воениот аеродром Тијас (Т-4) во Сирија.
Руската армија за нападот го обвини Израел, тврдејќи дека два израелски авиони Ф-15 го извршиле нападот врз сириската воздухопловна база Т-4, во провинцијата Хомс. Руското МНР нагласува дека израелските авиони го извршиле нападот преку либанскиот воздушен простор и дека сирискиот систем за против-воздушна одбрана соборил пет од осум истрелани ракети.
Израелската армија засега не ги коментира тврдењата на Москва.
Сириските власти првично соопштија оти се сомневаат дека зад нападот стојат САД. Сепак, американските власти, кратко по нападот отфрлија секаква одговорност, наведувајќи дека нивните сили не спроведуваат воздушни напади во Сирија.
Сириската опсерваторија за човекови права соопшти дека во воената база во Сирија се наоѓаат руски, ирански и сили на либанското движење Хезболах.
Воздрушниот напад на сириската воена база доаѓа два дена по нападот врз градот Дума, во близина на Дамаск, во кој наводно било користено хемиско оружје.
САД и Франција изминатите недели се заканија со напади во Сирија во случај сириските сили да користат хемиско оружје
Активистите на сириската опозиција за нападот во Дума, во кој настрадаа 40 лица, ги обвинија силите на сириската влада. Сирија и Русија ги отфрлија ваквите наводи.
Советот за безбедност на Обединетите нации, според најавите, треба да одржи итен состанок посветен на нападот со хемиско оружје во Дума. Состанокот е закажан на барање на девет од 15 членки на ова тело – САД, Велика Британија, Франција, Полска, Холандија, Шведска, Кувајт, Перу и Брегот на Слоновата Коска.