Падна камен од срцата на домашните навивачи, домашната репрезентација и нејзиниот стручен штаб. Русија на убедлив начин влезе во 21. Светското фудбалско првенство чиј домаќин е. „Зборнаја команда“ во воведниот меч на стадионот „Лужники“ во Москва ја декласира Саудиска Арабија со 5:0 (2:0) за враќање на насмевките на лицата на играчите, но и за самодоверба пред преостанатите два дуела со Уругвај и со Египет во групата А.
Русите ја истакнаа сета своја желба и мотив за триумфална презентација на стартот. Но, и инает за поправање на играчкиот и резултатски имиџ на тим што тешко може некого да победи, на тимот што не дава многу голови и за демантирање на дел од домашните авторитети како Андреј Канчелски кој во најава за мундијалот истакна дека „ова е најслабата руска репрезентација низ годините наназад“.
Велат „секое лошо за добро нека е“. Така и беше во Москва попладнево. Џагоев, една од перјаниците во составот на Черчесов, се повреди без контакт со противнички играч, па кон средината на првиот дел мораше предвреме да заврпи со настап. На негово место на тревникот беше уфрлен Черишев кој возврати со два гола и беше прогласен за играч на натпреварот. Најпрво во 43. минута за 2:0 и во првата од судиското екстра време за 4:0.
https://www.youtube.com/watch?v=RCoIVlo6Fyw
Меѓутоа играчот на Вилјареал не беше единствениот Русин што почна од клупа и возврати со гол во убедливата победа. Ѕјуба ги доби последните 20 минути од средбата, а веќе во првата по втрчување во терен, ја затресе саудиската мрежа за 3:0. Голеадата на „Лужники“ ја отвори Газински во 12. минута, ја затвори Головин во четвртата минута од продолжението на мечот на огромно задоволство и на рускиот претседател Владимир Путин кој заедно со првиот човек на ФИФА, Џани Инфантино и саудискиот принц Мохамед бин Салман го следеа натпреварот од свечената ложа на „Лужники“.
Првото коло во групата А на СП 2018 ќе биде комплетирано утре попладне со дуелот меѓу Египет и Уругвај од 14 часот.
Русија – Саудиска Арабија 5:0 (2:0)
Стадион „Лужники“ во Москва. Гледачи: 81.000. Гл. судија: Нестор Питана. Асистенти: Ернан Маидана и Хуан Пабло Белати (сите тројца од Аргентина). Ж. картони: Головин (Русија); Таисер (Саудиска Арабија). Стрелци: Газински 12’, Черишев 43’, 90’+1’, Ѕјуба 71’, Головин 90’+4’ за Русија.
Русија (формација 4-2-3-1): Акинфеев – Фернандеш, Кутепов, Игначевич, Жирков – Газински, Зобнин – Самедов (Кузјаев 64’), Џагоев (Черишев 23’), Головин – Смолов (Ѕјуба 70’). Селектор: Станислав Черчесов.
Саудиска Арабија (4-5-1): Абдула – Ал Бурајк, Осама, Омар, Јасер – Салем, Отајф (Фахад 64’), Салман, Таисер, Јахија (Хатан 72’) – Ал Сахлави (Муханад 83’). Селектор: Хуан Антонио Пици.