Рускиот претседател Владимир Путин му наложил на Министерството за надворешни работи да ја тужи американската влада поради заплената на руските дипломатски претставништва во САД, изјави портпаролот на Кремљ Дмитриј Песков.
Путин и претходно најави дека ќе бара да биде преземена правна акција поради како што вели кршење на сопственичките права на Русија од страна на Вашингтон.
-Тешко е да се разговара со оние кои ја мешаат Австрија со Австралија, а тоа е нивото на дел од американскиот естаблишмент, рече Путин.
Одговарајќи на новинарско прашање дали е разочаран од американскиот претседател Доналд Трамп, Путин рече дека прашањето е наивно, бидејќи како што истакна, „Трамп не е моја невеста, а јас не сум негов младоженец“.
Путин исто така рече дека Русија го задржува правото дополнително да го намали бројот на американскиот дипломатски персонал во Москва и од земјата да протера уште 155 лица, но како што рече, Москва во овој момент тоа нема да го направи.