Русија подготви нацрт резолуција за Советот за безбедност на ОН во која предлага формирање ново тело за истрага за случајот со хемиските напади во Сирија и работа врз „основа на детални и непобитни докази“.
– Сакаме да се издигнеме над несогласувањата и да предложиме да биде фомирано ново меѓународно истражно тело кое ќе утврди факти врз основа на детални и непобитни докази добиени со транспарентни и доверливи методи за да може СБ да ги идентификува оние кои се одговорни за употребата на отровни агенси како оружје, изјави Василиј Небензја, постојан претставник на Русија во ОН.
Според него, тоа треба да биде професионален и деполитизиран механизам.
Мандатот на Заедничкиот истражен механизам во Сирија на Меѓународната организација на ОН за забрана на хемиско оружје, (ОН-ОПЦВ) заврши на 18 декември 2017 година. Членките на СБ на ОН не успеаја да постигнат договор за продолжување на неговиот мандат.
Заедничкиот истражен механизам е формиран со резолуција на СБ на ОН во август 2015 година за да се идентификуваат одговорните за хемиските напади во Сирија.
Тоа тело досега издаде седум извештаи во кои укажува дека сириската влада е виновна за четири хемиски напади.