Статуи на Кристофер Колумбо и поранешниот претседател на Конфедеративните Американски Држави, Џеферсон Дејвис беа урнати за време на протестите против расизмот и полициската бруталност во сојузните држави Минесота, Вирџинија и Масачусетс.
Откорната е главата на статуата на Кристофер Колумбо во Бостон, соопшти синоќа полицијата по повиците на демонстранти за отстранување на статуи кои потсетуваат на колонизатори и робовладетели. Статуа на Колумбо, исто така, беше вандализирана и во центарот на Мајами, а друга беше отстранета и фрлена во езеро во неделата во Ричмонд, Вирџинија.
Демонстрантите со помош на јажиња ја урнаа бронзената статуа на Колумбо во градот Сент Пол во Минесота. Демонстрантите наведоа дека според нив, Колумбо е симбол на геноцид врз Индијанците. Додадоа дека неколкупати се обиделе да ја отстранат статуата преку политички процес, но не успеале.
Државните патролни војници кои го обезбедуваа комплексот Капитол во Минесота стоеја на дистанца и не се обидоа да ги запрат демонстрантите кои подоцна го прославија уривањето на статуата пеејќи индијански песни.
Сличен инцидент се случи во Ричмонд каде демонстрантите ја урнаа статуата на претседателот на Конфедерацијата, Џеферсон Дејвис. Минатата недела гувернерот на Вирџинија нареди отстранување на статуа на еден од хероите на Конфедерацијата, генерал Роберт Лиј.