Фудбалерите на Шкендија си беа поголем противник сами на себе отколку Номе Калју. Во реванш мечот од првото квалификациско коло за Лигата на шампиони влегоа со 1:0 од Талин, но загубија на арената „Тоше Проески“ од естонскиот првак со 1:2 со гол во 90 минута за болен пораз, елиминација и наместо двомеч со славниот шкотски Селтик се селат во Лига Европа на мегдан со Диделанж од Луксембург во второто коло. Оттука и заслужените свирежи што „црвено-црните“ ги добија од гледачите на северната трибина и заслужениот аплауз за гостите.
Тетовци одиграа бледо прво полувреме. Во второто нагазија на топка, но само до пеналот за израмнување на Агим Ибраими. И, пак, потонаа во сопствената самобендисаност. Имаа шанси, за волја на вистината, неколку пати ги тресеа рамките од противничкиот гол меѓутоа далеку беа од препознатливата игра на која сме навикнале да ги гледаме барем во почетните квалификациски рунди за УЕФА натпреварувањата. А, предвреме извадените британски визи за гостување во Глазгов им остануваат за спомен и горко сеќавање на балтичката бламажа.
Тренерот Ќатип Османи на прес-конференција по елиминацијата презеде одговорност за резултатското фијаско. Како проблем ја посочи реализацијата, бледилото, недоволната агресивност, невниманието по прекини што биле забележани како едно од најсилните оружја на Номе Калју.
„Имаме проблем со реализацијата. Укажав на тоа и по првиот меч. Бевме бледи во првиот дел, подобро го почнавме вториот, а, сепак, недоволно за победа. Отсуствуваше агресивност во нашата игра, доцневме во додавањата. Од анализите заклучивме дека може да бидат опасни по прекини, за жал не затворивме најдобро при двата примени гола. Разочарување, секако, е присутно. Одговорноста е моја. Не бегам од неа. Но, мора да се врати атмосферата во екипата бидејќи нè чека двомеч во Лига Европа“, истакна Османи.
Противникот за наредниот европски двомеч не е нималку наивен иако доаѓа од уште понефудбалска земја од Естонија. Се вика Диделанж и лани беше сензационален учесник во групната фаза во Лига Европа и доколку не биде променет пристапот, Шкендија ќе нагази на уште една мина по која ќе нема поправен за ова лето.
Лига на шампиони
1 коло, реванш мечеви
Шкендија (С. Македонија) – Номе Кајлу (Естонија) 1:2 (прв меч 1:0)
Сабуртало Тбилиси (Грузија) – Шериф Тираспол (Молдавија) 1:3 (3:0)
Б36 Торшавн (Фарски Острови) – Хелсинки (Финска) 2:2 (0:3)
Валета (Малта) – Диделанж (Луксембург) 1:1 (2:2)
Црвена звезда (Србија) – Судува (Литванија) 2:1 (0:0)
Фероникели (Косово) – ТНС (Велс) 0:1 (2:2)
Среда
Рига (Летонија) – Дандалк (Р. Ирска) (прв меч 0:0)
АИК Стокхолм (Шведска) – Арарат (Ерменија) (1:2)
Карабаг (Азербејџан) – Партизани (Албанија) (0:0)
Розенборг (Норвешка) – Линфилд (С. Ирска) (2:0)
Лудогорец (Бугарија) – Ференцварош (Унгарија) (1:2)
Клуж (Романија) – Астана (Казахстан) (0:1)
Пјаст Гливице (Полска) – БАТЕ Борисов (Белорусија) (1:1)
Марибор (Словенија) – Валур (Исланд) (3:0)
Сутјеска (Црна Гора) – Слован Братислава (Словачка) (1:1)
Селтик (Шкотска) – Сараево (БиХ) (3:1)