Денешниот состанок на врвот во Брисел е самит за спас на ЕУ. Лидерите ќе се обидат да ги надминат нивните длабоки разлики во ставовите во однос на миграциската криза и иднината на евро-зоната. За прв пат на европски самит Германката Ангела Меркел доаѓа со слаба позиција, уценета од нејзиниот министер за внатрешни работи Хорст Сихофер.
Ризикот е голем а времето кусо
Дебатата за миграцијата станува се пожешка, напиша вчера претседателот на ЕУ Доналд Туск во својата покана за самит испратена до лидерите на ЕУ. И побара да се најде решение за оваа криза. Во спротивно, предупреди Туск, популистичките движења «со авторитарна тенденција» во ЕУ ќе добијат на сила.
Писмото на Туск е сигнал дека оваа најнова европска криза може да го означи крајот на самата ЕУ онаква каква што ја познаваме.
«Ризикот е голем а времето кусо», вели Туск и потсетува дека бројот на мигранти што пристигнуаат на европските брегови е во остар пад споредено со 2015 година.
Оваа анализа ја дели и претседателот на Европскиот парламент Антонио Тајани. Во колумна во британскиот Гардијан, тој предупреди дека отсуството на договор во ЕУ може да означи крај на европскиот проект.
Првично, самитот требаше да ја реформира Даблинската регулатива за европската азилантска политика. Според ова правило, кандидатот за азил бара да го оствари тоа право во првата земја на ЕУ во која пристигнува. Но, напливот на мигранти во Грција и Италија и недостигот на европска солидарност во распределбата на миграцискиот товар, потпишаа смртна казна за оваа регулатива.
Стравот од крај на европскиот проект го делат повеќе ЕУ лидери и пратеници. Според европските медиуми денес, овој самит е “самит над самитите” кој треба да и даде насока на ЕУ која одамна го загуби компасот. Но, најубедените Европјаните се плашат дека големиот број ризици – Брегзит, лошите односи со САД, менаџирањето на миграциската криза, менаџирањето на евро-зоната и неспособноста на ЕУ да зборува во еден глас – ќе означат крај на ЕУ.
Миграциска политика под диктат на популистите
Кризата со која е соочена Меркел во нејзината влада, недостигот на солидарност од екс комунистичките земји во мигрантската криза, особено демагогијата и ширењето страв што го прави Унгарецот Виктор Орбан, и екстремно десната коалиција во Италија нема да дозволат да се најде прифатливо и солидарно решение за мигрантската криза.
По изборите во Италија, министерот за внатрешни работи Матео Салвини доби главна улога во оваа криза. Салвини како да е влезен во Твитер натпревар со Американецот Доналд Трамп во негативните коментари за мигрантите и луѓето што им помагаат. Профилот на Салвини му се допадна на Трамп па тој го покани Италијанецот на гости во Белата куќа.
Така, наместо да најде прифатливо и солидарно решение, ЕУ денес и утре уште повеќе ќе ги затвори своите граници и ќе бара место вон од ЕУ за мигрантите.
Туск им предлага на лидерите да продолжат со борбата против нелегалната миграција.
Улогата на Туск е потрагата по европски конзензус па така тој предлага отворање на «платформи» вон од ЕУ за мигрантите што доаѓаат преку Медитеранот. За ова зборуваше и Меркел пред неколку дена, со акцент на договорот со Турција. Според неа, тој договор може да биде модел и за други договори за кои ЕУ е спремна да плати до 6 милијарди евра.
Нацрт заклучоците на самитот ги повикуваат лидерите да донесат мерки за «секундарните движења» на мигрантите во ЕУ, проблем во срцето на кавгата помеѓу Меркел и Сихофер.
Најубав пример за ова европско затворање во сопствената тврдина е приказната за бродовите со мигранти кои со денови не успеваат да добијат дозвола за пристап до европско пристаниште. Последниот е Лајфлајн со 233 мигранти кој по една недела доби дозвола да пристане во Малта а претходно Аквариус кој со околу 600 мигранти пловеше со денови од едно до друго пристаниште и најпосле доби дозвола да пристане во Валенција во Шпанија.