Европската Унија нема намера да обрнува внимание или да ја коментира пропагандата на рускиот претседател Владимир Путин, изјави денеска портпаролката на ЕК за надворешни работи и безбедносна политика Анита Хипер.
Запрашана за коментар на ЕУ на предлогот на Путин за ставање на Украина под времена администрација на ОН, со цел да се овозможи одржување нови избори во земјата, Хипер изјави дека рускиот претседател е криминалец по кога е распишана меѓународна потерница и ЕУ нема да обрнува внимание или да коментира какви било прашања поврзани со неговата пропаганда.
Погледнете ги фактите. Факт е дека имаме агресор, ја имаме Украина, која не покажува ништо друго освен добра волја за мир и тука сме ние со нашата поддршка за Украина. Нашиот фокус е да се осигураме дека ќе имаме праведен и траен мир, рече Хипер.
Главната портпаролка на Европската комисија, Паула Пињо додаде дека претседателот на Украина, Володимир Зелински е легитимно и демократски избран и дека се додека украинскиот народ не бара нови избори, никој друг не може да предлага нешто такво.
Претходно, Советот за национална безбедност на Белата куќа реагираше на изјавата на Путин, истакнувајќи оти управувањето на Украина го одредува нејзиниот Устав и народот на земјата, изјави портпаролот на коментирајќи ги изјавите на рускиот претседател Владимир Путин, кој предложи воспоставување привремена администрација во Украина.
Путин го изнесе предлогот за ставање на Украина под администрација на ОН вчера за време на состанокот со војници на нуклеарна подморница во руската базата во Архангелск.
Таква практика постои и во принцип, се разбира, може да се разговара за можноста за привремена администрација на ОН со САД, европските земји и, се разбира, и со нашите партнери и пријатели, рече Путин.
Целта на таа времена администрација, според него, би била да се одржат демократски избори по кои „на власт ќе дојде влада способна да работи на мировен договор“. – Потоа ќе почнеме преговори за мировен договор, ќе потпишеме легитимни документи кои се признати во светот и се безбедни и стабилни, рече Путин.
Редовниот мандат на Зеленски заврши во мај 2024 година, но не може да се закажат избори поради воената состојба која е во сила веќе три години. Парламентот на Украина во февруари усвои резолуција, со која се потврдува легитимноста на Зеленски со јасно мнозинство. Многумина во Украина веруваат дека одржувањето на избори во услови на тековниот конфликт би било непрактично и нефер, бидејќи би било тешко да се обезбеди учество на војници и раселени цивили. На меѓународно ниво, Зеленски и понатаму е признат како претседател.