Хорхе Сампаоли и официјално е претставен како нов селектор на фудбалската репрезентација на Аргентина. Досегашниот менаџер на Севилја договори петгодишна соработка со тамошната федерација и на промоцијата во Буенос Аирес порача дека, првенствено, има две цели пред себе. Првата е да го извлече најдоброто од Лионел Меси, а втората е да ја врати довербата на навивачите кон националниот тим.
„Ова е остварување на сонот, ова е позицијата на која отсекогаш се восхитував. Потпишав договор до Светското првенство во 2022 година и се надевам дека заедно можеме да направиме нешто добро за аргентинскиот народ“, рече Сампаоли.
Тој е трет предводник на „гаучосите“ во квалификациите за СП 2018 по Хералдо Мартино и Едгард Бауза. Циклусот сè уште не е завршен, а Аргентина, по 14 кола, е петта на табелата со 22 бода, 11 помалку од лидерот Бразил. Големите јужноамерикански ривали ги делат Колумбија на второто место (24 бода) и Уругвај и Чиле кои имаат по 23.
Селекторско деби Сампаоли ќе има веќе на 9 јуни во Мелбурн во пријателски натпревар со „кариоките“. Првото, пак, искуство во квалификациите ќе го има против Уругвај на 31 август.
„Сè уште не сме пласирани во Русија, но убеден сум дека имаме ресурси за тоа“, заклучи новиот кормилар на Аргентина за кого Федерацијата ѝ плати 1,5 милиони на Севилја, колку што гласеше откупната клаузула, за негово предвремено ослободување од обврски кон екипата.