Македонската Православна Црква – Охридска Архиепископија (МПЦ-ОА) уште од почетокот на појавата на здравствената криза во нашата земја и во светот, се однесуваше конструктивно и во сите свои официјални соопштенија постојано апелираше до верниот народ за почитување и придржување кон препораките што водат кон сузбивање на пандемијата предизвикана од ковид 19, се вели во соопштението на Канцеларијата на САС на МПЦ-ОА.
Ваквиот став од таму доаѓа по сликите што се проширија на социјалните мрежи за масовната ѓурѓовденска литија во Струга на која учествуваа голем број на граѓани. Владата за настанот закажа итна седница, а јавноста бара одговорност и казни за полицијците кои ја обезбедуваа поворката додека дел од свештените лица признаваат дека ситуацијата излегла од контрола оти, како што вечат, „не очекувале таква масовност“.
Од Канцеларијата на САС на МПЦ-ОА велат дека во сиот изминат период, значаен од духовен аспект за православните христијани и за црковното живеење, вклучително и последните празнувања, верниот воцрковен народ, иако чувствувајќи ја насушната потреба од духовна храна, особено во вакви времиња, сепак остана послушен на апелите, сметајќи ги како акт на христијанска пожртвуваност и љубов.
„Во овој дух, МПЦ-ОА, уште еднаш истакнува дека ги почитува и се придржува, а во таа насока и го повикува верниот народ кон исполнување на официјалните мерки на Владата и здравствените власти за социјална дистанца и носење соодветни заштитни средства“, се вели во соопштението на Канцеларијата на САС на МПЦ-ОА.
„Пребивајќи во постојана увереност во милоста Божја и чекајќи спасение од Господа (Битие 49, 18), поучени од духовната историја и словото на светите отци, во овој период да ги удвоиме силите и севкупниот напор и кон духовните мерки, односно духовните средства во вакви и слични состојби, придржувајќи ги и применувајќи ги зададените профилактички мерки од страна на одговорните“, апелираат од МПЦ-ОА.