СДСМ најави многи брзо формирање на реформска влада и дека нема да дозволат поради стравот на Никола Груевски и соработниците од промените и соочување со правдата, Македонија да биде заглавена во понатамошна политичка криза.
„На кредиблни избори, признаени од домашната и меѓународната јавност, мнозинството граѓани на Македонија избраа промени. 67 пратеници, кои претставуваат околу 700.000 граѓани, очекуваат Парламентот и Ѓорге Иванов да одговорат на своите уставни должности и да го овозможат доделувањето на мандатот. И меѓународната заедница испрати јасна порака дека во демократијата секој треба да го признае парламентарното мнозинство. Блокадата на демократските процеси и наштети на економијата, посебно во последните неколку месеци и ги кочи неопходните реформски процеси“, се вели во соопштението на СДСМ.
Порачуваат, Никола Груевски и раководството на ВМРО-ДПМНЕ да се воздржат од активности што поттикнуваат меѓуетнички тензии, говор на омраза и ги вознемируваат граѓаните со лажни вести.
„Очекуваме утре и во деновите што престојат сериозно и одговорно државничко однесување од страна на институциите, коишто мора да ја почитуваат волјата на мнозинството граѓани и да овозможат избор на нов претседател и составување на новата Влада“, велат од СДСМ.