Никола Груевски мора да ја прифати реалноста. Тој може да се подготви единствено за опозиција и за соочување со правдата, реагираат од СДСМ на денешното гостување на лидерот на ВМРО-ДПМНЕ во дневникот на Канал 5.
„Ефектите од документите на Груевски ги почувствуваа граѓаните. Но заврши тоа време за лични криминали и криминали на неговите соработници. Сега пред целата домашна и меѓународна јавност е конкретен документ зад којшто стојат околу 700.000 граѓани на Македонија. Тоа е Програмата на новата реформска Влада на унитарна Македонија, којашто гарантира квалитетен живот за сите граѓани независно од каква било различност, правда за сите, заедништво и реформи за евроатланските интеграции. Таа Програма го разобличува Груевски и тоа го потресува, бидејќи му ги одзема сите лажни вести“, пишува во соопштението ан партијата.
Од СДСМ додаваат дека Груевски мора веднаш да се повлече од насилната реторика, да престане да шири немир и поделби кај граѓаните за непостоечки теми и да ги малтретира луѓето да ги бранат неговите криминали.
„Тоа што тој го прави е неговата паника и хистерија пред соочувањето со одговорноста. Единствено нешто што Груевски може да направи, е да подготви да замине, затоа што доаѓа нова влада“, велат од СДСМ.