Иванов е составен дел од проблемот што десет години ја влече Македонија назад, реагираат од СДСМ на годишното обраќање на претседателот.
„Нападите на Ѓорѓе Иванов кон мнозинството граѓани кои избраа промени, кон СЈО, кон ЕУ, НАТО и целата меѓународна заедница, е продолжение на политиките на конфликт на неговиот ментор Никола Груевски. Иванов е составен дел од проблемот што десет години ја влече Македонија назад. Тој со неуставните и незаконски помилувања, застана во заштита на криминалот, против интересите на народот и доцна е да се правда, за се ќе има одговорност. Граѓаните препознаа дека овие несериозни политичари, Груевски и Иванов ги загрозија државните и националните интереси и сакаат изолација на Македонија за спас на криминалците. Затоа излегоа масовно на изборите и во огромно мнозинство порачаа дека сакаат нова одговорна Влада, институции на граѓаните и живот“, пишува во соопштението на СДСМ.
Со реакција за обраќањето на Иванов, излегоа и од БЕСА. Од партијата велат дека она што Иванов го зборувал во обраќањето, не е во негова надлежност.
– Македонија мора да пристапи кон редефинирање на политичкиот систем, на меѓуетничките односи и на севкупниот државен систем, каде што и албанскиот јазик ке биде официјален на целата територија на Македонија. Тоа што го има изјавено г. Иванов не е во надлежност на Претседателот на државата, рече Фатон Фазлиу, шеф на кабинетот на Претседателот на БЕСА.