Со барањето амнестија за лицата кои на 27 април извршија или беа помагачи на терористичкото загрозување на уставниот поредок и безбедност, ВМРО-ДПМНЕ докажа дека токму тие ги нарачале и стојат зад насилствата на крвавиот четврток кога се случи организиран обид за убиство на пратеници, а загрозена беше и безбедноста на новинари и вработени во Собранието, реагираат од СДСМ, по соопштението од опозициската ВМРО ДПМНЕ во кое најавија дека покренува иницијатива за итно и неодложно ослободување и амнестирање на сите лица кои извршиле „одредени законски прекршувања во инцидентите пред и во парламентот на 27 април 2017 година“.
-Колку и ВМРО-ДПМНЕ да се обидува да ги спаси своите извршители од одговорност за крвавиот четврток, не смее да има амнестија за оние кои учествуваа или помогнаа во обидот да се убијат пратеници. Во Македонија, како и во секоја демократска земја не може да има амнестија за тешки кривични дела како обид за убиство, терористичко загрозување и дела против државата и уставниот поредок, се вели во соопштението од СДСМ.
Од владејачката партија нагласуваат дека предлог законот за амнестија не предвидува ослободување на лица што сториле кривични дела против државата и кривични дела злосторничко здружување.