На денот на започнувањето на предизборните кампањи, Социјалдемократскиот сојуз во соопштение до медиумите ја испрати првата порака, во која велат „Со Груевски нема напред“.
– Македонија под власта на Никола Груевски стана неслободна земја. Во последниот извештај на Фридом хаус за слободата на печатот од 2016 година, Македонија забележа дополнителен пад на листата и од групата делумно слободни влезе во групата неслободни земји. Македонија во оваа група е единствена од земјите во соседството, потенцира СДСМ.
Наведувајќи го извештајот, од партијата велат тоа е бидејќи на виделина излегле скандалозните информации за масовното и нелегално прислушување новинари од страна на владата, корупциските врски меѓу функционери и сопственици на медиуми, како и зголемените закани и напади врз медиумски работници.
– Македонија под власта на Груевски падна и на листата на Репортери без граници каде од 34 место во 2013 година стигнавме до 118 место од вкупно 180 земји. Груевски ги затвораше медиумите кои одбиваа да му бидат послушни, а ги корумпираше послушните медиуми и потоа кај нив порачуваше прилози и текстови, се вели во соопштението до медиумите на СДСМ.
Најголемата опозициска партија им порачува на граѓаните дека на 11.декември, тие имаат можност да го променат ова со својот глас.
– Доколку сакате слободни медиуми и слободна Македонија, изберете го Планот за живот во Македонија, се вели во пораката на СДСМ.
Предизборните кампањи започнуваат денеска а ќе траат до 9.декември на полноќ.