Енди Мареј е прв финалист на АТП Мастерсот во Лондон. Британецот, по голема драма, го совлада Милош Раониќ со 5:7, 7:6, 7:6 во меч што траеше три часа и 38 минути што е рекорд на завршните турнири во сезоната. Негов противник во мечот со титулата ќе биде подобриот од второто полуфинале меѓу Новак Ѓоковиќ и Кеи Нишикори што се игра вечерва по второто полуфинале во двојки меѓу Џејми Мареј и Бруно Соареш и Рајев Рам и Равен Класен.
Мареј одлично го почна мечот. Првите два гема на свој сервис ги доби без загубен поен по што следуваше стагнација во неговата игра. Раониќ пропушти една брејк топка во петтиот гем и уште три во деветтиот, но успеа, сепак, да излезе на крај со првиот светски рекет. Ја искористи петтата шанса во 11 гем за водство со 6:5, брејкот го потврди во наредниот гем за водство со 1:0 во сетови.
Вториот сет донесе уште поголема борба и драма. Канаѓанецот спаси гем на свој сервис и во следниот, од втор обид, успеа да одземе сервис за предност со 2:1. Тоа како да беше причина за Британецот да се размавне. Експресно врза осум поени и направи пресврт за водство со 3:2. Од тој моменти и двајцата тенисери почнаа да играат посигурно, па одлуката на чија страна ќе заврши сетот падна во тај-брејк. Мареј покажа пповеќе нерви и со комбинација на форхенди и излегувања на мрежа стигна до 4:1. На тоа возврати Раониќ и по 10 поен успе да израмни на 5:5, но не издржа. Наредните две поена ги доби миленикот на публиката во „О2 арена“ за 7:5 и израмнување на 1:1.
Загубениот сет не го депримира Раониќ кој подобро го отвори решавачкиот период од полуфиналето. Го остави Мареј на нула при двата свои гем сервиси за 2:1, а во меѓувреме не искористи и брејк топка. Но, држеше ритам и во добар дел го диктираше. Релативно сигурно ги решаваше своите сервиси, му создаваше проблеми на Мареј при неговите иако брејк немаше. Тенисерот со црногорско потекло си обезбеди 0:30 во осмиот гем меѓутоа и водечкиот на АТП листата беше на одлично нив на концентрација. Нанижа три поени во низа и со ас израмни на 4:4. Дека е така покажа во наредниот. Го остави Раониќ на нула, направи брејк за 5:4 и доби сервис за меч што, сепак, не го искористи и дозволи нов егал за 5:5. Но, разочарувањето во салата набрзо го амортизира. Направи нов брејк за ново водство и нов сервис гем за победа и повторно не успеа. Четирите брејка во низа значеа и нов тај-брејк.
Како заврши основата на третиот сет, така почна и неговиот продолжение. Со два мини брејка. Потоа, воглавно, се играше поен за поен до втората промена на страните. Раониќ спасуваше меч топки, но четвртата не успеа за 11:9 или 7:6 или 2:1 за Британецот за осма победа во меѓусебните дуели.