Пребеганиот фудбалски функционер Здравко Мамиќ во тајност се раздолжил со хрватската држава и во државната каса уплатил 52 милиона куни (седум милиони евра), на што го обврзуваше правосилната пресуда на Жупанискиот суд во Осиек за „испумпување“ на пари од Динамо Загреб, пренесуваат медиумите во Хрватска.
Државното Обвинителство, не наведувајќи притоа имиња, потврди дека, поради наплата на одземена имотна корист врз основа на правосилната и извршна пресуда на Жупанискиот суд во Осиек од 6 јуни во 2018 година, со сопругата на осудениот склучило договор за подмирување на обврските на 28 јуни во 2021 година.
Државата, и пред склучување на договорот со сопругата на Мамиќ, а откако пресудата стана правосилна, ги наплати претходно блокираните 7,5 милиони куни (еден милион евра). Со тој договор, сопругата на Мамиќ се обврза да ја исплати преостанатите средства (44,5 милиони куни) во рок од 30 дена.
Наведениот износ бил уплатен на 21 јуни во 2021 година во корист на Буџетот на Хрватска, дознаваат хрватските медиуми од избори блиски на Државното Обвинителство.
Здравко Мамиќ во 2018 година беше осуден на шест и пол години затвор за „испумпување“ на 116 милиони куни (15,392 милиони евра) од Динамо Загреб. Врховниот суд во март оваа години ги потврди сите клучни делови од пресудата против Зоран и Здравко Мамиќ.
Против Мамиќ и соработниците се води уште еден судски случај за извлекување на пари од Динамо, а се наоѓа под истрага и за подмитување на судии во Осиек за да судат во негова корист.