Претседателот на Косово, Хашим Тачи за запирањето на возот на линијата Белград -Северна Митровица, на Твитер напиша дека се надева, дека Србија извлекла поуки од својата провокација кога го испратила возот на Косово
“Добрите соседи не си пречат едни со други, тие разговараат “,напиша Тачи.
Таканаречениот„руски воз“, по 18 години вчера за прпават тргна од Белград за Косовска Митровица, од каде по неколку часа чекање беше вратен назад. Богато украсен со национални симболи и верски мотиви, на кој однадвор на 20 јазици пишува„Косово е Србија“, возот вчера пристигна на станицата во Рашка, по што беше вратен назад од безбедносни причини, како што рекоа српските власти. Српскиот премиер Александар Вучиќ изјави дека пругата била минирана и се правдаше дека Србија испратила воз, а не тенк на Косово.
Односите меѓу Белград и Приштина се на точка на вриење. Со случувањата од вчера, тензиите се зголемуваат.
Случувањата поврзани со возот се последните рефлекси на американската администрација во заминување, изјави српскиот претседател Томислав Николиќ по завршениот состанок на Советот за национална безбедност.
Тој рече дека многу држави го поддржуваат ставот на Србија и се очекува за целиот случај со возот да се изјасни ЕУ.
„Предмет на дијалогот во Брисел треба да биде само возот, односно слободата на движење, инаку не гледам за што треба да преговараме со привремените институции на Косово“, изјави Николиќ.
Точката еден од Бриселскиот договор е слободата на движење, сите граѓани да имаат право да се движат на територијата, и да не може никој да ги спречува.
Има и точка, рече Николиќ во која се наведува дека специјалните единици РОСА не можат да се појават северно од Ибар без одобрување на НАТО и локалната заедница.
Тој ја повика ЕУ да одговори дали е точна изјавата на косовскиот премиер дека за запирање на возот косовските власти имале согласност од Унијата. Според Николиќ, синоќешното појавување на единицата РОСА покажува дека Албанците сакаат војна.
„Ги предупредувам привремените институции во Приштина да не навлегуваат на територија каде што не можат да бидат. Ние не сакаме војна, но по Уставот сме должни да ја заштитиме секоја педа од територијата и граѓаните. Секој нов обид ќе се заврши многу лошо. Нека размислат за тоа Албанците и нивните спонзори“, рече Николиќ.
Тој нагалси дека Србија е подготвена да испрати оружени сили на Косово доколку српското население во покраината е загрозено.