Министерот за образование, Јетон Шаќири на денешната владина седница посочи дека утрово искомуницирал со претседателот на Синдикатот, но укажа дека со најавите за генерален штрајк, никогаш не било посочено оти ќе има прекин во наставата.
„Сакам што поскоро образовниот процес да продолжи. Ние имавме состанок со Советот на СОНК, се дискутираа неколку теми и беше кажано тоа што е сега во јавноста за покачување на платата од 2500 денари. Ние може секојдневно да бидеме во преговори, но не сакам да има последици на образовниот процес. Членовите на СОНК имаат дискутирано за тоа и имаат одлучено дека 95 проценти од членовите се за тоа да не се прифати десетпроцентното покачување“, изјави денеска Шаќири.
Според него, ако се погледне наназад низ годините, 10 проценти е највисокиот процент понуден за покачување на платите во образовниот сектор. Тој вели дека се наоѓаме во економска криза, но и покрај ова, никогаш не било кажано дека нема да има покачување.
„Има простор за дискусија, но треба да се има предвид дека во претходните години не сме имале криза како во моментот. Денеска имав комуникација со претседателот на СОНК. Не треба со СОНК да имаме различни информации. Имаше изјава дека не е вистина дека е дадена оваа понуда од Владата. Не сакам вакви дезинформации“, додаде министерот.
Тој најави и нови преговори за да се разгледа ситуацијата.
„Кажано е дека ќе го направиме максимумот според состојбата во која се наоѓаме. Ќе имаме период на преговори за да ги разгледаме овие ситуации. Има различни видови на штрајк, но во дописот кој беше испратен до МОН за генерален штрајк не беше кажано дека со штрајкот ќе има прекин на настава. Директорите одлучуваат како ќе се одвива наставата или крајно нека одлучат родителите, тие нека проценат дали ќе ги однесат децата. Требаше да известат дека ја прекинуваат наставата. Донесена е одлука за генерален штрајк и немавме некои други известувања. Наставниците треба да имаат предвид во какво време се наоѓаме, нека ги известат децата особено учителите од прво до петто одделение“, апелираше Шаќири.