Посмртните останки на повеќе од 50 загинати фудбалери, тренери и претставници на Шапекоенсе како и новинари што настрадаа во авионската несреќа во Колумбија пристигнаа во Шапеко на југот на Бразил каде ќе биде организиран голем заеднички погреб. Транспортните авиони од типот „Херкулес“ беа дочекани со огномет додека пристапуваа кон дождовната писта на градскиот аеродром.
Воените летала беа дочекани од бразилсиот претседател Мишел Темер, а веднаш по слетувањето почна поворката низ градските улици кон стадионот „Конда арена“. На бдеењето што е закажано за вечерва се најавени и селекторот на „кариоките“, Тите и првиот човек на Светсата фудбалска асоцијација (ФИФА), Џани Инфантино. Почит кон загинатите играчи на Шапекоенсе и сочувств до семејствата на сите настрадани изминатите денови, меѓу другите, изразија и Диего Армандо Марадона, Пеле, Кристијано Роналдо, Лионел Меси.
Стадионот на Шапекоенсе може да прими 19.000 лица. Со оглед дека бројката на луѓе кои ќе сакаат да ги испратат настраданите кон вечното почивалиште се очекува да биде неколкукратно поголема, околу „Конда арена“ се поставени џиновски видео-бимови. За семејствата на загинатите и нивните пријатели се обезбедени 2.000 шатори.
Натпреварите од последното коло во групната фаза во Лигата на шампиони на УЕФА во вторник и среда ќе започнат со едноминутно молчење како што е случај и на сите фудбалски тревници во националните првенства ширум светот овие денови.