Нема да запреме се додека не се понесе одговорност, додека не завршат во апсаана и додека не се конфискува имотот, порачаа на денешниот протест учесниците на Шарената револуција.  Фокус на денешниот протест  беа нарачаните над 50 уметнички слики со позлатени рамки на високото раководство на ВМРО-ДПМНЕ за нивниот партиски штаб – сторија која ексклузивно ја објави НОВА.

Шарена револуција: Гоблен со сликата на ВМРО-ДПМНЕ зад решетки

Демонстрантите носат гоблен со урамена сликата на раководството на партијата, но зад решетки, а главниот транспарент кој ја предводеше колоната беше со слоганот „Нашата уметност е бесплатна“.

13318978_1121407164567561_990162906_n

Балоните со боја и денеска завршија кон Собранието и Владата, а пред присутните говори одржаа демонстранти од различна генерација. „Командосите“ пак на Шарената револуција добија ордени за заслуги пред граѓаните.

-Дали знаете дека со секој поминат ден нивната сметка во банките е се појака, дали знаете дека и денеска повторно не задолжија, дали знаете дека додека ние протестираме, они прават планови за некој парк за мајмини во Аеродром. Па зошто и ги трошат парите за парк на мајмуни кога си имаме вакво Собрание? Да ги поставевме тие мајмуни во Собранието, сега ќе бевме на нула, а не во зијан. Освен мајмуни и луѓето има уште една класа, а тоа се нелуѓето – токму тие прават криминал. Затоа на сите криминалци и нивните помагачи ќе им кажам три збора,а  тоа е одговорност, апсаана и конфискација,  рече Марјан Ненов, кој напомена дека година ипол протестира против Регулаторната Комисија за енергетика.

-Ти Груевски не мотивираше да се бориме за подобра иднина, ти ја крена оваа генерација на нзое и ни даде шанса да увидиме дека моќта е во наши раце, ние сме твојот крај, а крајот ти тропа на врата. Ме радува што ако продолжиме вака, оваа беда никогаш повторно нема да не снајде. Доста беше едноумие, дојде време на шареното, дојде време на слобода, праведна Македонија од која нема да сакам да си одам – нема правда, нема мир, порача демонстрантката и студентка Александра Филипова.

Говор пред граѓаните одржа и потпретседателот на СДСМ Алексндар Кирацовски, кој ги охрабри демонстрантите да ја продолжат битката.

-За Груевски ќе одлучуваат судии, за Македонија слободните избори, посочи Кирацовски.

Граѓаните обединети под Шарената револуција веќе осум недели преку протести бараат повлекување на целосната одлука за аболиција и оставка на Иванов, формирање на специјално одделение на Кривичниот суд за предметите на Специјалното јавно обвинителство, оставка на Владата предводена од ВМРО-ДПМНЕ и ДУИ, како и итно ослободување на притворените демонстранти. Дел од барањата се и  вклучување на граѓанското општество во решавање на кризата и формирање на преодна влада.

Се до исполнување на овие барања, тие најавуваат дека нема повлекување од улица, а освен бојадисувањето на објекти најавени се и други форми на притисок кон власта.