Најдолг стаж како државник меѓу актуелните европски шефови на држави и влади има претседателот на Белорусија, Александар Лукашенко, кој оваа функција континуирано ја извршува од јули 1994 година. Лукашенко својот прв претседателски мандат го започна со победа во вториот круг, а оттогаш уште петпати убедливо победува на претседателските избори, секој пат во првиот круг.
За да може да биде претседател повеќе од двапати, Лукашенко организираше референдум во 2004 година, на кој околу 80 отсто од белоруските гласачи гласаа за укинување на ограничувањето на бројот на претседателски мандати.
Позицијата број два на листата на најдолговечни европски државници суверено ја држи рускиот претседател Владимир Путин, кој е на власт подолго од кој било лидер на Русија по советскиот диктатор Јосиф Сталин.
Путин владее со земјата, како премиер или претседател, континуирано од крајот на 1999 година, кога на изненадување на многумина тогашниот шеф на руската држава Борис Елцин го назначи за премиер. Веќе следната година Путин првпат стана претседател на Русија, беше реизбран во 2004 година, а во периодот од 2008 до 2012 година ја извршуваше функцијата премиер на Русија.
Тој се врати на позицијата шеф на државата по изборите во 2012 година, а актуелниот претседателски мандат, кој трае шест години, го започна во 2018 година. Слично како и Лукашенко, Путин најпрво ја иницираше промената на Уставот, а потоа и донесувањето на закон кој му ја отвори вратата уште два пати потенцијално да биде избран за претседател на Русија.
Турскиот претседател Реџеп Тајип Ердоган, кој се бори за својот трет претседателски мандат, е еден од тројцата европски државници кои континуирано се на власт повеќе од три децении.
Основачот и лидер на Партијата на правдата и развојот (АКП), која победи на парламентарните избори во 2002 година само една година по нејзиното основање, стана премиер на Турција на 14 март 2003 година. Оваа функција ја извршуваше континуирано до август 2014 година, кога стана претседател на државата.
Вториот претседателски мандат на Ердоган почна во 2018 година, а дали по трет пат ќе биде избран за претседател на турската држава ќе се знае по вториот круг од изборите што ќе се одржи на 28 мај.
Следен на листата е унгарскиот премиер Виктор Орбан, кој по доаѓањето на власт помина еден период и во опозиција. Тој во опозиција беше осум години по завршувањето на неговиот прв мандат како премиер, кој траеше од 1998 до 2002 година. Орбан се врати на власт во 2010 година и оттогаш не ја испушта. Во мај 2022 година, четврти пат по ред беше избран за премиер.
Холандскиот премиер Марк Руте се наоѓа на оваа функција од 14 октомври 2010 година. Тој е првииот либерален премиер на Холандије уште од 1918 година. Владата на Марк Руте е малцинска со поддршка на Партијата за слобода на Херт Вилдерс.
Мајкл Хигинс е деветти и актуелен претседател на Ирска. Должноста претседател ја преземал на 11 ноември 2011 година по победата на претседателските избори во Ирска.
Доколку донеодамнешниот претседател на Црна Гора, Мило Ѓукановиќ победеше на последните претседателски избори во таа земја, ќе беше убедливо прв на листата на европски државници кои најдолго се на власт.
Ѓукановиќ беше избран за премиер на Црна Гора првпат на 15 февруари 1991 година, на неговиот 29 роденден, па во тоа време беше најмладиот шеф на влада во Европа. Потоа уште шест пати беше на чело на црногорската влада, а во својата политичка биографија имаше и два мандата како претседател на Црна Гора.
Г. Т.