За една година од потишувањето на Протоколот за прием во НАТО добивме 28 ратификации, за многу кратко време нашето членство ќе биде заверено и ќе удриме печат за нашето постоење како независна, суверена и просперитетна држава. Ќе бидеме дел од семејството од безбедносниот чадор кој штити една милијарда луѓе. Ова го истакна министерката за одбрана, Радмила Шекеринска по повод ратификацијата на Североатлантскиот договор за кој, меѓу другото, рече дека многу значи во однос на бројките во Армијата, чии припадници први ги почуствувале бенифитите преку платите, условите за работа и перспективата во војската.
Во однос на ширењето на лажни вести и скептицизмот од Алијансата, Шекеринска цитираше одредба од вчера потпишаниот Договорот со НАТО кој посочува дека страните во Договорот се решени да ја чуваат слободата, заедничкото наследство, цивилизацијата на своите народи засновани на принципите на демократија, индивидуалната слобода и владеење на правото. Министерката рече дека опозицијата веќе го поддржала законот за служба во Армијата и дека не би требало да има пречка и за поддршка на законот за одбрана.
„Вчера се уверивме дека во Парламентот гласаа сите, вклучително и колегите од ВМРО-ДПМНЕ. Се прашувам кој утре или задутре, повторно ќе заговара рушење на Преспанскиот договор и поништување на нашето членство во НАТО. Баш би сакала да го видам јунакот, кој по ваков консензус, да ги поништи вчера дадените гласови во парламентот и оној кој ќе се дрзне да го поништи најголемиот успех од независноста до денес“, истакна Шекеринска.
Министерката рече дека очекува Собранието да не потклекне пред задачата што ја има за донесување на Законот за одбрана. Потенцира дека ВМРО-ДПМНЕ со пет-шест пратеници го поддржа законот за служба во Армијата каде е сменето името „Армија на Република Македонија“ со името „Армија на Република Северна Македонија“ и дека сега немаат никакво алиби и оправдување да го не поддржат законот за одбрана кој, според неа, покажува на кој начин ќе се вклучиме во колективната одбрана.
Шекеринска додаде дека, според информациите од Шпанија, тамошниот Парламент можно е да го ратификува договорот на почетокот од март оваа година и дека нашата Влада се подготвува врз основа на тие информации.