„Сакаме земјите-членки на НАТО праведно да го делат товарот на трошоците за одбрана“, изјави заменик-генералната секретарка на НАТО, Радмила Шекеринска, во интервју за ХРТ на Форумот во Дубровник.
Шекеринска ја нагласи важноста на трансатлантската солидарност и посочи дека неодамнешниот самит на НАТО во Хаг, на кој беше договорено драматично зголемување на одбранбените трошоци на 5% од БДП, претставува историски пресврт во функционирањето на Алијансата.
„Самитот беше историски бидејќи ја трансформираше и зајакна Алијансата. Целта беше НАТО да стане посилен во одвраќањето на агресија, но и пофер во однос на распределбата на обврските“, изјави Шекеринска.
Во разговорот таа подвлече дека посветеноста на САД на Членот 5 и на европската безбедност останува силна, но истовремено се очекува и европските сојузници и Канада да преземат поголем дел од одговорностите.
„Не можеме само да се потпираме на САД. Оваа посветеност од американска страна доаѓа со очекувања – дека и Европа ќе вложи повеќе во својата безбедност“, истакна таа.
Шекеринска потврди дека Русија и тероризмот и понатаму се сметаат за најголеми закани за евроатлантската безбедност.
„Сигурноста на Украина е поврзана со нашата. За да ја гарантираме таа сигурност во иднина, како што ја штитивме во последните 75 години, мораме да инвестираме во одбрана“, рече таа.
Заменик-генералната секретарка истакна дека сите 32 земји-членки веќе се согласиле околу клучните стратешки цели: обуки, набавка на вооружување и унифицирана воена стратегија.
Покрај тоа, таа говореше и за важноста на зајакнување на одбранбената индустрија и за континуираната поддршка за Украина, вклучително и испраќањето оружје, како дел од пошироката стратегија за стабилност и одвраќање на закани во регионот.