Се зголемува бројот на болнички капацитети во сите 16 болници кои ќе добијат модуларни мини инфективни одделенија со цел нормалната патологија да не трпи и пациентите да можат да добијат здравствена услуга, како и да не се креираат листи на чекање. Ќе се инсталираат и апарати за дијагностика во сите овие центри за брза дијагноза на вирусот, најави министерот за здравство, Венко Филипче.

Тој во синоќешното гостување во емисијата „Само вистина“ на ТВ Канал 5, рече дека здравствениот систем веќе два месеца интензивно се подготвува за есенските месеци со зајакнување на постојните јавно-здравствени установи за третман на пациентите со коронавирус.

„Сите врвни експерти во нашата држава се вклучени во лекувањето преку системот за консултација, па дури и физички присуствуваа. И анестезиолозите по систем на ротација се присутни во одделенијата каде што се лекуваат пациентите од Ковид-19 кои се поставуваат на респираторна машина. Тоа се експерти со големо искуство во ракување со овие машини. Лекувањето на пациент на респираторна машина во интензивна нега, без разлика од која причина, е медицина во мало. Таму се обединети знаења и искуства од многу специјалности“, додаде Филипче.