Фенербахче ја запиша шестата победа во деветтиот настап во кошаркарската Евролига во оваа сезона. Турскиот клуб го совлада Армани во Милано со 79:70 (21:17, 23:19, 14:27, 21:7) и се искачи на третата позиција на табелата зад ЦСКА Мосва и Реал Мадрид. Перо Антиќ одигра 19 минути во кои реализира седум поени.
Македонскиот интернационалец беше прецизен во единствениот обид за „два“, стоотстотен беше и од линијата за слободни фрлања (2/2) и погоди една тројка од шест упатени удари. Кон нив додаде три скока (1 дефанзивен и два офанзивни) и по една асистенција и украдена топка. Пет негови соиграчи завршија со двоцифрен број кошеви. Ги предводеше Костас Слукас со 18, Диксон уфрли 14, Калиниќ 13, Удох 11 и Датоме 10. Раким Сандерс беше најефикасен во поразената екипа со 17 поени.
Победа на гости забележа и Макаби Тел Авив. „Гордоста на Израел“ славеше во Пиреја против Олимпијакос со 80:73. На останатите три меча триумф на домашните тимови. Реал Мадрид го доби Уникс Казан со 89:75, Жалгирис го совлада Бросе Бамберг со 86:72, а Анадолу Ефес ѝ нанесе тежок пораз на Црвена звезда со 100:79.
Деветтата рунда во Евролигата ќе биде комплетирана утревечер. ЦСКА Москва е домаќин на Басконија, Галатасарај ја дочекува Барселона, Панатинаикос во Атина ќе игра против Дарушафака.
Евролига
Резултати, 9. коло
Реал Мадрид – Уникс Казан 89:75
Армани Милано – Фенербахче 70:79
Жалгирис – Бросе Бамберг 86:72
Олимпијакос – Макаби Тел Авив 73:80
Анадолу Ефес – Црвена звезда 100:79