Градоначалникот на Град Скопје, Петре Шилегов изјави дека Општина Сопиште има автономно право да носи одлуки, коментирајќи ја одлуката на Советот во оваа Општина, кој побара Здружението за духовно обединување на Сетинци, Попадинци и Крушоради да им го отстапи споменикот на Андон Јанев Ќосето, што беше отстранет од пред судовите, за да биде поставен на кружниот тек кон Сончев град.
-Општината Сопиште може да си носи автономни одлуки какви што сака. Сопиште може да посака и метро, рече Шилегов.
Споменикот се наоѓа во магацинот на МЗТ, а на негово место како што најавија од Град Скопје, ќе биде засадено дрво гинко, под кое ќе биде изгравиран Членот 10 од Општата повелба за човекови права на Обединетите нации.
Тој информира дека Град Скопје има допис од Претпријатието „Рудници и железарница“ институти кои ги лиеле спомениците од Здружението, тие се неплатени кон нив и од Градот бараат изветување каде се наоѓаат спомениците за нивни потреби во судската постапка што ја водат за неплатен долг за споменици.
-Тоа значи дека Град Скопје примил неплатена донација, рече Шилегов.
Град Скопје веднаш по отстранувањето на споменикот минатиот четврток испратил дописот до Здружението на адресата која е оставена во Градот за кореспонденција во моментот кога биле донирани спомениците. Досега, како што потврдија од Град Скопје немаат добиено никаков одговор од Здружението.