Ако на ВМРО-ДПМНЕ му понудиме Закон за амнестија, одеднаш ќе исчезнат тиранската платформа, народот од улица и кризата во Македонија, изјави портпаролот и пратеникот на СДСМ, Петре Шилегов за ТВ 21.
Тој во дебатната емисија „Клик плус “, каде беше единствен гостин бидејќи повиканиот од ВМРО ДПМНЕ не се појави, нагласи дека Иванов и Вељаноски ги кочат демократските процеси во земјава.
-Девет дена ВМРО-ДПМНЕ го кочи процесот Илија Димовски да стане претседател на Комисијата за именување, што е апсурд сам по себе. Прво условуваа, 5 дена стоевме во место кога започна нашето барање за продолжение на Конститутивната седница, затоа што самиот тој посака да биде нејзин претседател, вели Шилегов.
Според Шилегов, нема дилеми во однос на разните толкувања на членовите на Деловникот за работата на Собранието.
-Нема рази толкувања, се е јавно во Деловникот, но ВМРО-ДПМНЕ упорно се обидува да даде поинакви толкувања. Ние не се согласивме и со тоа Вељаноски да биде претседавач на конститутивната седница. Вељаноски треба да покаже минимум професионално достоинство и да се врати во пратеничките клупи, а да остави со седницата да претседава најстариот пратеник. Би требало да најде сила и да се повлече. Ова е апсурдна ситуација. Претставниците на ВМРО-ДПМНЕ мoлат по Европа да бидат амнестирани нивните функционери. Целата држава е заложник на педестина криминалци, рече тој.
Шилегов, меѓу другото, најави и дека СДСМ ќе направи генерален реизбор на судството, бидејќи тоа се „препартизира“.
-Затоа ќе бараме генерален резибор на судиите. Судството сега е партизирано и без професионален интегритет. Ако ние денеска на ВМРО-ДПМНЕ му понудиме амнестија, ќе исчезне платформата, ќе исчезнат протестите…“, изјави Петре Шилегов во емисијата Клик плус на ТВ 21.