Владата на Шпанија вчера го одобри Протоколот за пристапување на Република Северна Македонија во НАТО и веднаш го достави на усвојување во Сенатот. Кабинетот на премиерот Педро Санчез побара ратификација на документот по итна постапка имајќи предвид дека неговата земја е последна од 29-те членки на Алијансата што го нема тоа направено, пренесува шпанската новинска агенција ЕФЕ.
„Неопходно е ратификацијата да биде по итна постапка со цел да не се одложуваат заложбите на Шпанија како сојузник во НАТО за прием на Северна Македонија во Алијансата“, се вели во образложението на шпанската Влада.
Владата во Мадрид во јули лани достави барање до Парламентот за ратификација на протоколот, но поради распишувањето на предвремените парламентарни избори на 10 ноември постапката беше прекината. Лидерот на социјалистите, Санчез на почетокот на овој месец доби поддршка за формирање на коалициска влада со што се стави крај на речиси едногодишната политичка криза во четвртата по големина економија во еврозоната.