Швајцарскиот весник „Блик“ објави, српскиот тенисер потврди. По неодамнешните прегледи во Прага, Новак Ѓоковиќ се подложи на хируршки зафат на лактот во клиниката во Мутенц во близина на Базел.
„Народе, ви должам некои информации за рехабилитацијата. Со оваа повреда се носам две години и во сиот изминат период се сретнав со многу лекари. Притоа беа предложени различни опции и дијагнози. Воопшто не беше лесно да се одбере начин за борба со лактот“, се обрати Ѓоковиќ до јавноста преку „Инстаграм“.
Српскиот ас отсуствуваше од тениските терени во втората половина на 2017 година. Се врати на Австралија опен со надеж дека проблемот е минато, но болките, сепак, беа присутни и во Мелбурн.
„Минатата година паузирав шест месеци мислејќи дека ќе се опоравам во целост меѓутоа, за жал, болките не минаа. Ми недостасуваше тенисот, во крвта ми е, па морав да се пробам на Австралија опен. Затоа пред неколку дена прифатив мала операција на лактот. Се чини дека сум на добар пат за целосно опоравување. Одлично се чувствувам, позитивен и со нетрпение чекам да се вратам на терен“, додаде Ѓоковиќ.
Зафатот што Ѓоковиќ го направи во Швајцарија ќе продуцира пад на АТП листата. Но, прашањето што се поставува е кога би можело да се очекува на негово враќање на терените. Пауза несомнено ќе има, за периодот на мирување што ќе следува не сакаше да говори. Она што е сигурно е пропуштање на турнирот во Акапулко, мали се шансите да настапи и во Индијан Велс од 3 до 8 март, истото се однесува и за Мајами од 21 март до 1 април. Шпекулациите упатуваат дека најоптимистичка опција е Мастерсот во Монте Карло во втората половина на април што во превод значи два месеца за рехабилитација по операцијата во Мутенц.