САД и другите западни земји вчера, во Советот за безбедност во Обединетите Нации (ОН) ја обвинија Русија за “варварство” во Сирија додека авионите на сирискиот режим и нивните руски сојузници без прекин од петокот го бомбардираат Алепо.
Советот за безбедност одржа итна сесија на барање на САД, Велика Британија и Франција.
Овие три земји сакаат да ја сопрат авионската интервенција. Целта на Русија и Сирија е да ги урнат бунтовниците од регионот на Алепо со што Дамаск би добил поени во овој конфликт.
Американската амбасадорка во ОН Саманта Пауерс имаше остри зборови против Русија која треба да биде сојузник во дипломатските напори да се стави крај на војната во Сирија и конечно да се сопре бранот на бегалци од овој регион.
Саманта Пауерс
“Ова што Русија го прави и поддршката што ја дава не е борба против тероризмот туку варварство”, изјави таа отфрлајќи го главниот руски аргумент дека Москва и Дамаск се борат против тероризмот. Според неа, Москва ја користи “историската привилегија” на постојано членство во Советот за безбедност на ОН:
“Историјата нема да биде нежна со земјите од Советот за безбедност кои молчат пред ова крвопролевање”, рече таа.
Руските аргументи
Витали Чуркин
Нејзиниот руски колега Витали Чуркин ги повтори условите на Москва и пред се неопходноста да се направи разлика помеѓу умерената опозиција и екстремистичките групи во конфликтот.
Чуркин смета дека одговорноста за блокадата врз меѓународната коалиција која ја предводат САД:
“Стотици групи беа вооружени а земјата беше неразумно бомбардирана. Во овие услови мирот е практично невозможна задача”, рече Русинот.
Но Москва не се откажува од повторно воспоставување на прекин на огнот и според амбасадорот, целата е прекин на огнот и обновување на преговорите.
Франција смета дека во Сирија се случуваат воени злострорства кои мораат да бидат казнети и ги обвини Москва и Дамаск дека продолжуваат со воени средства а мировните преговори им служат како маска.
Велика Британија најави тужба до Меѓународниот кривичен суд кој е компетентен за воени злосторства. Сепак, последниот обид во таа насока се судри со руско вето.
Пеколот на Алепо
Алепо вчера
Во Алепо деновиве бомбите паѓаа како дожд а загинале најмалку 124 лица од кои 19 деца, како што јави Сириската обсерваторија за човекови права.
Според невладините организации половина од пациентите во болниците се деца и жени.
Населението сведочи за нов тип на бомби кои предизвикуваат еден вид земјотрес и ги уриваат зградите вклучително и подрумите.
Околу 250.000 жители на квартовите во кои се наоѓаат бунтовниците повеќе не добиваат помош од надвор а од саботата повеќе немаат ни вода, тврди УНИЦЕФ.
ЕУ, САД, Франција, Германија, Италија и Велика Британија го вперија прстот кон Русија означувајќи ја како виновна на овој нов бран на насилство во Алепо и објавија соопштение во кое се вели дека “Русија треба да докаже дека е расположена и способна да преземе посебни мерки за да се спасат дипломатските напори”.
Кревкиот прекин на огнот преговаран помеѓу Вашингтон и Москва не издржа повеќе од една недела а дипломатските напори беа безуспешни.
Улогата на Турција
Во целата оваа ужасна реалност, Турција игра исто така улога. Претседателот Реџеп Таип Ердоган најави дека неговата земја е подготвена да учествува во операција што ќе ја водат САД за да се избркаат џухадистите од терористичката организација Исламска држава од нивното седиште во Рака. Ердоган има еден услов – Курдите од Сирија не треба да учествуваат во оваа операција. Овие Курди ја имаат поддршката САД.