Белгиската разузнавачка служба тесно соработуваше со други европски земји повеќе од една година за да го открие скандалот со мито што сега го тресе Европскиот парламент, соопшти Министерството за правда, пренесува Еуроактив.
Обвинителите се сомневаат дека грчката европратеничка Ева Каили и уште три други примале мито од домаќинот на Светското првенство Катар во обид да влијаат врз креирањето на политиката на Европската унија во еден од најголемите скандали што го погоди европскиот блок од 27 земји.
Катар и Каили негираа дека сториле нешто лошо.
„Ние бевме премногу наивни… премногу долго“, рече портпаролот на Министерството за правда, мислејќи на, како што ги нарече, тајните операции на странските сили во Белгија. „Сега подобро се екипираме против ова“.
Портпаролот ја нарече истрагата „голем случај на кој Државната безбедност работи повеќе од една година, во соработка со странски разузнавачки служби, за да ги обелодени сомнежите за корупција на европратениците од различни земји“.
Белгиската полиција објави фотографија на која се гледаат 1,5 милиони евра во готовина што ги најде во рациите од петокот до понеделникот, вклучително и куфер преполн со банкноти од 50 и 100 евра и две актовки уредно наредени со банкноти од 50 евра.
Инспекторите во Италија проверуваат седум банкарски сметки поврзани со осомничените, изјави извор близок до истрагата, додавајќи дека тие пронашле 20.000 евра во готовина во куќа на еден осомничен. Пребарале и канцеларија во Милано, рекол изворот.
Во меѓувреме, Каили, која е во притвор по нејзиното апсење минатата недела, ќе знае на 22 декември дали ќе остане зад решетки за време на истрагата, рече извор близок до истрагатаНејзиниот адвокат Михалис Димитракопулос, кој вели дека таа инсистира дека нема никаква врска со купиштата пари што ги пронашла полицијата, рече дека Каили побарала повеќе време за да го подготви нејзиното сослушување во притвор, првично планирано за вчера.
„Во координација со нејзиниот адвокат во Брисел се договоривме да побараме одложување за неколку дена за да се подготвиме“, рече Димитракопулос.
Останатите тројца осомничени уапсени и обвинети се испрашани според планот, вчера, од тричлениот совет од судии.
Партнерот на Каили, Франческо Џорџи, кој е пратенички асистент, ќе остане во притвор, како и Пјер Антонио Панцери, поранешен европратеник и основач на непрофитна група за кампања, соопшти обвинителството. Николо Фига-Таламанка, генералниот секретар на групата, ќе го напушти затворот, но ќе носи електронска ознака за глуждот.
Европскиот парламент во вторникот гласаше за одземање на потпретседателската функција на 44-годишната Каили. Пратениците ја повикаа целосно да се повлече од Собранието.
„За нас, овој случај е уште почувствителен и поважен бидејќи го допира срцето на европската демократија“, изјави портпаролот на канцеларијата на федералното јавно обвинителство на Белгија, Ерик Ван Дујс, во вторникот за Ројтерс.