Најавите и желбите на Бобан Грнчаров се остварија. Вардар остана непоразен на домашен терен и во третиот европски настап ова лето, но и за победничко добредојде за новиот тренер Чедомир Јаневски. По Малме (3:1) и Копенхаген (1:0) во квалификациите за Лигата на шампиони, на „Телеком арена“ вечерва падна и големиот Фенербахче со 2:0 во првиот меч од плеј-офот за Европа лигата. Барсегјан во 20 минута и Топал со автогол во 92. беа стрелци на головите за македонскиот првак кој е страшно блиску да стане и прв клуб од домашното поднебје што ќе заигра во групна фаза на натпреварување на УЕФА. Реваншот е во Истанбул на 24 август.
Фенербахче играше, Вардар чекаше и дочека. Одличната тактика што ја постави Чедомир Јаневски вроди со плод во првото полувреме. Полуконтрата што севна во 20 минута во гол ја претвори Ерменецот како најава за, резултатски, прекрасната августовска фудбалска вечер во Скопје. Претходно во два наврата се закани и Николов, но без ефект како на колегата од нападот. Гостите од Турција се обидоа да израмнат до паузата меѓутоа Гачевски и дефанзивците пред него љубоморно ја чуваа залихата од еден гол.
Ништо поинаква слика на теренот не донесе ниту продолжението. „Црвено-црните“ останаа доследни на определбата за контри и полуконтри, свесно препуштајќи ја средината на тревникот на екипата на Фенербахче. Гигантот од Истанбул се вложи максимално за израмнување, патот до вардаровата мрежа ја бараше и со нафрлени топки од страничните позиции и преку централниот дел во полето. Пукнатина, сепак, не најде.
Јаневски освежи дел од позициите. Демири го замени со Брдаровски по левата страна, Којашевиќ со Џигаури и во финишот на терен го испрати и Глигоров како поддршка за одбраната наместо офанзивниот Блажевски за целосна контрола на ситуацијата и обезбедување на резултатот. Но, наместо минимален триумф, вардарци прославија, а фановите поздравија, одлична предност за реваншот во Истанбул.
Финишот на мечот донесе две исклучувања меѓутоа и автогол на Фенербахче што ги зафрли во сенка црвените картони за Грнччаров и Соуза. Лошата комуникација на Топал со голманот Камени значеше и дуплирање на водство на Вардар во втората минута од судиското продолжение за ерупција на воодушевување меѓу присутните на „Телеком арена“. Контактот на топката со глава што беше замислен како враќање до сопствениот голман се прероди во лоб, потег што Топал го направи да биде најславениот и најомилен гостински играч во Скопје во последните неколку години.
Вардар – Фенербахче 2:0 (1:0)
Стадион: „Телеком арена“ во Скопје. Гледачи: 20.000. Гл. судија: Лука Банти. Асистенти: Матео Пасери и Фабијано Прети (сите тројца од Италија). Ж. картони: Грнчаров (Вардар); Солдадо (Фенербахче). Ц. картони: Грнчаров 89′ (Вардар); Соуза 90’+3′ за Фенербахче. Стрелци: Барсегјан 20′, Топал 90’+2′ (автогол) за Вардар.
Вардар (формација: 4-2-3-1): Гачевски – Демири (Брдаровски 46′), Новак, Грнчаров, Хамбарцумјан – Спировски, Николов – Блажевски (Глигоров 85′), Којашевиќ (Џигаури 67′), Фелипе – Барсеган. Тренер: Чедомир Јаневски.
Фенербахче (формација: 4-4-2): Камени – Калдирим, Шкртел, Топал, Озбајракли (Чахечоуче 71′)- Валбуена, Туфан (Исла 82′), Соуза, Дирар – Потук, Косе (Солдадо 65′). Тренер: Ајкут Кочаман.