Во Словенија денеска децата се вратија во градинките, дел од учениците почнаа со настава, а по точно два месеца од утрово се отворени и внатрешните делови на рестораните и кафулињата.
Градинките во кои важат строги правила со цел спречување на ширењето на коронавирусот од утрово ги отворија вратите за децата, кои повеќе од два месеца беа дома.
Повторно работат и училиштата, но само за учениците од прво, второ, трето и деветто одделение. Според словенечкото Министерството на образование, утрово во училиште дошле вкупно 64.497 ученици, односно 34,5 отсто од вкупниот број основци во земјата. Од денес отворени се и установите за престој и образование на деца со посебни потреби.
Викендот што мина сопствениците на угостителските објекти го искористија за адаптација на просторот за да можат од денес да работат, почитувајќи ги сите препораки за заштита од коронавирусот.
И покрај тоа што земјата прогласи крај на епидемијата, сите гости при при влегувањето во затворениот дел од рестораните и кафулињата задолжително ќе мора да носат заштитни маски, се до оној момент кога ќе седнат на масите, кои ќе бидат меѓусебно раздалечени два метри. Персоналот ќе мора цело време да носи маска, а објектот редовно ќе се чисти.
Со ваквата одлука се задоволни во словенечката Комора на угостители, бидејќи се желеа дека работата само на надворешните делови од објектите не е доволно тие да бидат рентабилни.
Инаку, според одлуката на Националниот институт за јавно здравје, наставниците и предавачите ќе мораат да носат заштитни маски, а просториите треба комплетно да се дезинфицираат неколкупати во текот на денот.