Македонија е со најмала просечна плата во регионот на поранешна Југославија додека Словенија е на врвот на листата, јавува агенцијата „Анадолија“.
Словенија со реализирана месечна нето плата од 1.077,77 евра за мај оваа година е земја во регионот во која има највисоки примања и тоа е единствената која изнесува над илјада евра. Просечната плата во Македонија во мај оваа година изнесувала 399,28 евра (24.509 денари), се наведува во истражувањето кое го објави „Анадолија“.
Највисоко зголемување на просечната нето плата е забележано во Хрватска. Таму личните приходи се зголемиле за 71,42 евра и достигнаа 866,95 евра во однос на истиот период лани.
Во Црна Гора просечната плата во јуни изнесувала 511 евра. Во Босна и Херцеговина во мај била на ниво од 448,59 евра, а во Србија 426 евра.
Во Црна Гора просечната нето заработувачка во јуни оваа година во однос на еден месец претходно забележала пад од 0,2 отсто, додека просечната нето заработувачка во јуни 2018 година во однос на истиот месец претходната година забележал раст од 0,2 отсто.
Словенија е единствена земја од поранешните југословенски републики што има суфицит во надворешно-трговската размена со странство. Така покриеноста на узвозот со извозот во земјата изнесува 102,1 отсто за првите пет месеци од оваа година.
На второ место е Србија со 76,3 отсто, трета е Македонија со 74,7 отсто, во БиХ за првите шест месеци во 2018 година е 62,48 отсто, во Хрватска за пет месеци е 59,7 отсто.
Најмала покриеност на увозот со извозот има Црна Гора – 16,5 отсто.