Коронавирусот и затворените граници не влијаат врз товарниот транспорт и снабдувањето на нашата земја со карго пратки од пристаништето во Солун, а во петокот кон Скопје тргнал товарен воз со 30 контејнери наменети за македонската индустрија, јави дописничката на МИА од Атина.
Од солунското пристаниште соопштуваат дека, и покрај исклучително тешката ситуација, „остануваат посветени на заложбата за обезбедување на квалитетни услуги и непречено функционирање на трговскиот сообраќај на пристаништето“.
„Во петокот, на 27 март, од пристаништето во Солун со крајна дестинација Скопје, тргна товарен воз со 30 контејнери наменети за индустрии во соседната земја. Ова претставува важна разврска во одржувањето на континуитетот на работата на услугите на синџирот на снабдувањето за оние кои го користат пристаништето во Солун, а кое игра водечка улога како порта на Балканот“, соопштуваат од солунското пристаниште.