Милијардерот Џорџ Сорос одлучи да не молчи повеќе на нападите на унгарскиот премиер Виктор Орбан и анти-семитската и анти-имиграциска кампања на унгарската влада во која го користи името на Сорос против мигрантите и бегалците. Кампања која чини речиси 13 милиони долари.
Тој испрати одговор во кој се вели дека тажен што “унгарскиот режим се служи со анти-семитски слики како дел од нивната кампања за дезинформирање; истовремено, ме охрабрува тоа што заедно со многубројни сограѓани од лидерството на унгарските Евреи отворено зборуваат против оваа кампања”.
Заедницата на унгарските Евреи пред неколку дена го повика премиерот Орбан да и стави крај на оваа кампања.
Во писмото Сорос потсетува дека во Унгарија донирал 400 милиони долари и ја осуди кампањата која потсетува на “најцрните денови на Европа”.
На билбордите на оваа кампања се гледа Сорос, кој е Евреин, како дава поддршка на нелегалната имиграција со слоганот – “да не му дозволиме на Сорос да се смее последен” а на билбордот пишува дека 99 отсто Унгарци не сакаат бегалци во земјата.
Орбан одамна и упорно се спротивставува на планот на Европската комисија која веќе две години бара од земјите членки на ЕУ да примат одреден број бегалци во сразмер со големината на земјата.
Сорос “би сакал да види 1 милион бегалци од различни културни потекла да се населат во Европа секоја година”, вели Орбан. “За него миграцијата е добар бизнис а причината што е толку лут на Унгарија – и на мене лично – е што стоиме на патот на неговите големи планови и големиот бизнис проект”, додаде Орбан.
Ни Сорос не бил нежен со Орбан и го обвини дека во Унгарија направил мафијашка држава.
Сорос во писмото вели дека тој, како човек што го преживеал Холокаустот, кој се криел на нацистите во Будимпешта и потоа бил бегалец и самиот, “од прва рака знае што значи да се биде во животна опасност”. Тој додава дека ги дели европските вредности: “Тврдењето дека Сорос промовира шема на увоз на милион нелегални имигранти во Европа е само имагинација на Орбан”.
Контрадикторните изјави на Израел
Минатиот викенд израелскиот амбасадор во Унгарија ја критикуваше оваа кампања на унгарската влада велејќи дека “тоа евоцира тажни спомени и буди омраза и страв”.
Но, израелскиот премиер наскоро ќе патува во официјална посета на Унгарија. Па така, неколку часа по оваа изјава, стаса нова изјава од израелскиот министер за надворешни работи во која се демантира изјава на амбасадорот и се вели дека “Сорос е легитимна цел на критика”.
“На ниту еден начин изјавата на амбасадорот не значи делегитимирање на критиката против Џорџ Сорос кој постојано ја поткопува израелската демократски избрана влада”, вели министерот Емануел Нахшон.
Во Унгарија во април 2018 година се одржуваат парламентарни избори па Сорос станува се почесто цел на нападите на владата на Орбан кој исто така бил корисник на помошта на Сорос.
Орбан годинава се обиде да го затвори Универзитетот на југо-источна Европа кој се наоѓа во Будимпешта и е финансиран од Сорос. Претходно ги зајакна правилата за финансирање на невладините организации за поддршка на независно сусдство, образование и човекови права, организации кои ги користат донациите на Сорос и води анти-европска кампања.