Откако Собранието едногласно изгласа да им се одземе имунитетот на пратениците Крсто Мукоски, Јохан Тарчуловски, Жаклина Пешевска, Љубен Арнаудовски, Љупчо Димовски и Сашо Василевски, создадени се услови судот да одлучи по однос на предлогот за одредување мерка притвор. Каква ќе биде одлуката ќе зависи од судиите на претходна постапка на кои се доделени распитите на пратениците, дознава НОВА од извори во судот.
Оттаму не откриваат дали веќе се обезбедени осомничените пратеници за насилствата во Собранието на 27.април, иако според законот, кога се работи за одлука за притвор, тие веднаш треба да бидат донесени во Кривичниот суд.
Пратениците од владејачкото мнозинство, без присуство на опозицијата, денеска го одобри барањето за одобрување притвор на пратениците поднесено од Основен суд Скопје 1 од Одделот за организиран криминал на 28 ноември.
Претседателот на Собранието Талат Џафери веднаш по завршувањето на денешната седница ги потпиша одлуките за симнување на имунитетот на шестмината пратеници од коалицијата ВМРО-ДПМНЕ и тие се веќе проследени до Кривичниот суд.
Пратеничката група на ВМРО-ДПМНЕ пред почетокот на седницата, соопшти дека нема да учествува, нарекувајќи ја „политичка фарса, чија единствена цел е реваншизам, сеење омраза и уништување на сите оние кои што мислат различно“.
„Желбата на СДСМ е да имаат апсолутна и неконтролирана власт во Република Македонија. ВМРО-ДПМНЕ ги разгледува сите возможни опции за да се спротивстави на ова безумие и да се стави во заштита на луѓето кои неправедно се дел од политички монтирани процеси без разлика дали тоа се пратеници, официјални лица или обични граѓани, чии единствен грев е што се дрзнале врз основа на својата совест и убедување да се спротивстават на политиките на СДСМ“, наведе во соопштението Пратеничката група на ВМРО-ДПМНЕ.
Со тоа заврши постапката предвидена со Деловникот на Собранието и Уставот за симнување на пратеничкиот имунитет.
Пратениците беа донесени на распит кај судија на претходна постапка на 28.ноември.