Фалкао го доби дуелот со Левандовски, Колумбија ја разоружа Полска. Јужноамериканскиот претставник го декласира европскиот со 3:0 во групата Х и остана во игра за осминафинале на Светското фудбалско првенство. Мина ја отвори серијата голови на „Казањ арена“ во 40. минута, Квадрадо ја затвори во 75. минута, во меѓувреме погоди и Фалкао во 70. минута, за убедлив триумф на составот на Хозе Пекерман, на задоволство на многубројните нивни навивачи на трибините меѓу кои беа и легендите на колумбискиот фудбал, Рене Игита и Карлос Валдерама.
Полска не успеа да се носи со предизвикот. Фудбалерите на Адам Навалка согорија во желбата да останат на мундијалот и по 180 одиграни минути во него не успеаја да нè убедат зошто им беше доделена улога на носители при извлекување на групите за завршниот турнир. На стартот загубија од Сенегал (1:2), вечерва и од Колумбија за пакување, па дуелот што им претстои против Јапонија ќе нема никакво значење по ко-домаќинот на континенталниот шампионат во 2012 година.
https://www.youtube.com/watch?v=R9JktRfDNpk
Колумбија, пак, е спротивното од Полска по двете одиграни кола на СП. Широкиот репертоар на оружја со кој пристигна во Русија, вечерва се активира и „пукаше“ од сите позиции кон голот на Војчех Шчесни. Момчињата во сино-розева комбинација ги фатија конците во натпреварот и во ниту еден момент не им побегнаа од раце. Славеничката атмосфера што ја градеа 40. минути не дозволија да биде нарушена до последниот свиреж на мексиканскиот арбитар Рамос и заслужено ги впишаа првите бодови во Х конкуренција. Но, и со нив нема да бидат мирни бидејќи се наметнуваат како императив и против незгодниот Сенегал. За разлика од нив, турнирот во Русија за Полјаците ќе заврши на 28 јуни во Волгоград со меч против Јапонија која попладнево ремизира со Сенегалците (2:2) и изби на лидерската позиција во групата Х.
Рекордна победа на Англија на СП низ историјата, Панама „настрада“ со 6:1
https://www.youtube.com/watch?v=mwxfgcgQ09c
Покрај овие два меча, денешниот натпреварувачки ден на СП го одбележа и убедливиот триумф на Англија против дебитантот Панама со 6:1. Хет-трик постигна неверојатниот Хари Кејн, двапати во листата на стрелци се впиша Џон Стоунс, а еднаш и Џеси Лингард за рекордна победа на „Гордиот албион“ во настапите на Светските првенства низ историјата.
Рекордот, пак, останува во сопстеност на Унгарија. Популарната „лесна коњица“ од средината на минатиот век го понижи Салвадор со 10:1 на турнирот во Шпанија во 1982 година. Унгарците ја имаат и втората најубедлива победа на мундијалите што беше изразена со девет гола разлика против Јужна Кореја во 1954 година. Позицијата во оваа статистичка категорија ја делат со поранешна Југославија чии „сини“ го декласираа Заир со 9:0 на Светското првенство во 1974 година што го организира тогашна Западна Германија на што, секако, се сеќаваат повозрасните љубители на фудбалот во земјава.
Полска – Колумбија 0:3 (0:1)
Стадион: „Казањ арена“ во Казањ. Гледачи: 42.783. Гл. судија: Сезар Рамос. Асистенти: Марвин Торентера и Мигел Ернандез (сите тројца од Мексико). Ж. Картони: Беднарек, Горалски (Полска). Стрелци: Мина 40’, Фалкао 70’, Квадрадо 75’ за Колумбија.
Полска (формација 3-4-3): Шчесни – Паздан (Глик 80’), Беднарек, Пишчек – Рибус, Горалски, Криховјак, Бережински (Теодорчик 72’) – Ковнацки (Гросицки 57’), Зиелински, Левандовски. Селектор: Адам Навалка.
Колумбија (формација 4-2-3-1): Оспина – Мохика, Мина, Санчез, Ариас – Бариос, Агилар (Урибе 32’) – Родригез, Кинтеро (Лерма 73’), Квадрадо – Фалкао (Бака 78’). Селектор: Хозе Пекерман.